୭୦ତମ ଜାତୀୟ ଚଳଚ୍ଚିତ୍ର ପୁରସ୍କାର ତାଲିକାରେ ରହିଛି ଓଡିଆ ସିନେମା। ବାବୁସାନଙ୍କ ଅଭିନୀତ ଦମନକୁ ଶ୍ରେଷ୍ଠ ଓଡ଼ିଆ ସିନେମା ସମ୍ମାନ ମିଳିଛି। ଅଭିନେତା ବାବୁ ସାନଙ୍କ ଅଭିନୀତ ଦମନ ଏକ ସତ୍ୟ ଘଟଣା ଉପରେ ଆଧାରିତ । ଏହି ଫିଲ୍ମରେ ଜଣେ ଯୁବ ଡାକ୍ତର ସିଦ୍ଧାର୍ଥଙ୍କର କର୍ତ୍ତବ୍ୟନିଷ୍ଠ କାହାଣୀ ପ୍ରତିଫଳିତ ହୋଇଛି ।
ସିଦ୍ଧାର୍ଥ ଡାକ୍ତରୀ ପାଠ ଶେଷ କରିବା ପରେ ସେ ମାଲକାନଗିରି ଜିଲ୍ଲା ଉପାନ୍ତ ଅଞ୍ଚଳ ଜାନବାଇ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ନିଯୁକ୍ତି ପାଆନ୍ତି । ଆଉ ମାଓ ପ୍ରବଣ ମାଲକାନଗିରିରେ ମ୍ୟାଲେରିଆ ଦୂରିକରଣ ପାଇଁ ନିଜକୁ କିଭଳି ଉତ୍ସର୍ଗ କରିଦିଅନ୍ତି ତାହା ଏଥିରେ ଦେଖିବାକୁ ମିଳିଥିଲା ।
ଏହି ଫିଲ୍ମରେ ଦେବୀ ପ୍ରସାଦ ମିଶ୍ର ଓ ବିଶାଲ ମୌର୍ଯ୍ୟଙ୍କ ନିର୍ଦ୍ଦେଶନା ଦେଇଥିବାବେଳେ ବାବୁ ସାନ ଓ ଦିପାନ୍ୱିତ ଦାଶମହାପାତ୍ରଙ୍କ ଚମତ୍କାର ଅଭିନୟ କରିଥିଲେ । ଚଳଚ୍ଚିତ୍ରଟି ଓଡ଼ିଶା ସମେତ ରାଜ୍ୟ ବାହାରେ ମଧ୍ୟ ମୁକ୍ତିଲାଭ କରିଥିଲା । ପରେ ଏହାକୁ ହିନ୍ଦୀ ଭାଷାରେ ମଧ୍ୟ ଅନୁବାଦ କରାଯାଇଥିଲା ।
ସେହିପରି ରିଷବ ସେଟ୍ଟୀ ଶ୍ରେଷ୍ଠ ଅଭିନେତା ହୋଇ ଥିବାବେଳେ ନିତ୍ୟା ମେନନ୍ ଓ ମାନସୀ ପାରେଖ ଶ୍ରେଷ୍ଠ ଅଭିନେତ୍ରୀ ବିବେଚିତ ହୋଇଛନ୍ତି। ଚର୍ଚ୍ଚିତ ଚଳଚ୍ଚିତ୍ର କାନ୍ତାରା ପାଇଁ ରିଷବଙ୍କୁ ଶ୍ରେଷ୍ଠ ଅଭିନେତା ସମ୍ମାନରେ ସମ୍ମାନିତ କରାଯାଇଛି। ଥିରୁଚିତ୍ରାମ୍ବଲମ ପାଇଁ ନିତ୍ୟା ଓ କଚ୍ଛ ଏକ୍ସପ୍ରେସ୍ ପାଇଁ ମାନସୀ ପାରେଖ ଶ୍ରେଷ୍ଠ ଅଭିନେତ୍ରୀ ସମ୍ମାନ ପାଇଛନ୍ତି। ୭୦ତମ ଜାତୀୟ ଚଳଚ୍ଚିତ୍ର ପୁରସ୍କାର ଶର୍ମିଲା ଟାଗୋରଙ୍କ ଅଭିନୀତ ‘ଗୁଲମୋହର’କୁ ଶ୍ରେଷ୍ଠ ହିନ୍ଦୀ ସିନେମା ପୁରସ୍କାର ମିଳିଛି।
