ଇସଲାମାବାଦ୍: ଭାରତର ପଡୋଶୀ ଦେଶ ପାକିସ୍ତାନ ଲୋକଙ୍କ ପାଖରେ ଖାଦ୍ୟ ସାମଗ୍ରୀ କିଣିବା ପାଇଁ ଟଙ୍କା ନାହିଁ। ସରକାର ଋଣ ବୋଝରେ ପୋତି ହୋଇ ଯାଇଛନ୍ତି। ଏବେ ଆଉ ଏକ ସମସ୍ୟା ପାକିସ୍ତାନ ସରକାରଙ୍କ ଆଗକୁ ଆସିଛି। ପାକିସ୍ତାନୀ ସଂସଦରେ ମୂଷା ଆତଙ୍କ ସମସ୍ତଙ୍କୁ ଅସୁବିଧାରେ ପକାଇଛି। ଏହି ସମସ୍ୟାର ମୁକାବିଲା ପାଇଁ ସରକାର ସଂସଦରେ ମୂଷାମାନଙ୍କୁ ମାରିବା ପାଇଁ ବିଲେଇମାନଙ୍କୁ ନିୟୋଜିତ କରିବାକୁ ଯାଉଛନ୍ତି।
ଏହି ଯୋଜନା ପାଇଁ ପାକିସ୍ତାନର ନ୍ୟାସନାଲ ଆସେମ୍ବଲି ୧.୨ ମିଲିୟନ୍ ଅର୍ଥାତ୍ ୧୨ ଲକ୍ଷ ଟଙ୍କା ବଜେଟ୍ ଆବଣ୍ଟନ କରିଛି। ଏହି ଯୋଜନା ଅନ୍ତର୍ଗତ କିଛି ସ୍ବତନ୍ତ୍ର ତାଲିମପ୍ରାପ୍ତ ବିଲେଇଙ୍କୁ ସଂସଦ କମ୍ପ୍ଲେକ୍ସରେ ରଖାଯିବ। ସେମାନେ ମୂଷାମାନଙ୍କୁ ଧରିବେ। ସଂସଦରେ ମୂଷାଙ୍କ ସଂଖ୍ୟା ଏତେ ବୃଦ୍ଧି ପାଇବା ଯୋଗୁ ସେମାନେ ସଂସଦର କାର୍ଯ୍ୟରେ ବାଧା ଦେଉଛନ୍ତି। ମୂଷାମାନେ ବହୁ ଗୁରୁତ୍ୱପୂର୍ଣ୍ଣ ଦଲିଲକୁ ନଷ୍ଟ କରୁଛନ୍ତି।
ଅଧିକାରୀମାନେ କହିଛନ୍ତି ଯେ ବିଲେଇମାନଙ୍କୁ ନିୟୋଜିତ କରିବା କେବଳ ମୂଷା ସମସ୍ୟାର ସମାଧାନ କରିବ ନାହିଁ ବରଂ ଏହା ଏକ ପ୍ରାକୃତିକ ଏବଂ ପରିବେଶ ଅନୁକୂଳ ପଦ୍ଧତି ମଧ୍ୟ ହେବ। ବିଲେଇମାନଙ୍କୁ ମୂଷା ମାରିବା ପାଇଁ ତାଲିମ ଦିଆଯିବ ଏବଂ ସଂସଦ କମ୍ପ୍ଲେକ୍ସରେ ରଖାଯିବ। ଏହି ଯୋଜନା କିଛି ଲୋକଙ୍କ ପାଇଁ ମଜାଦାର ମନେହେଲେ ମଧ୍ୟ ଏହା ଏକ ଗମ୍ଭୀର ସମସ୍ୟାର ସମାଧାନ ବୋଲି ପାକିସ୍ତାନ ସରକାର କହିଛନ୍ତି।
ପୂର୍ବରୁ ପାକିସ୍ତାନ ସଂସଦରେ ମଧ୍ୟ ମୂଷାଙ୍କ ସମସ୍ୟା ଥିଲା, କିନ୍ତୁ ବର୍ତ୍ତମାନ ଏହା ଏତେ ବୃଦ୍ଧି ପାଇଛି ଯେ ଏହାକୁ ତୁରନ୍ତ ସମାଧାନ କରାଯିବା ଆବଶ୍ୟକତା ରହିଛି। ବିଲେଇ ନିଯୁକ୍ତି ଯୋଜନା ଖୁବ ଶୀଘ୍ର ଆରମ୍ଭ ହେବ ବୋଲି ଆଶା କରାଯାଉଛି। ଅଧିକାରୀ କହିଛନ୍ତି ଯେ ମୂଷା ସମସ୍ୟାର ମୁକାବିଲା ପାଇଁ ଏହା ଏକ ପ୍ରଭାବଶାଳୀ ଏବଂ ବ୍ୟୟବହୁଳ ଉପାୟ।
