ନେପାଳର ପୋଖରାରୁ କାଠମାଣ୍ଡୁ ଅଭିମୁଖେ ଯାଉଥିବା ଏକ ଭାରତୀୟ ପର୍ଯ୍ୟଟକ ବସ୍ ଶୁକ୍ରବାର ତାନାହୁନ୍ ଜିଲ୍ଲାରେ ଏକ ନଦୀକୁ ଖସି ପଡ଼ିଛି। ଏହି ଦୁର୍ଘଟଣାରେ ମହାରାଷ୍ଟ୍ରର ୨୭ ଜଣ ଯାତ୍ରୀଙ୍କ ମୃତ୍ୟୁ ଘଟିଥିବା ବେଳେ ୧୬ ଜଣ କାଠମାଣ୍ଡୁର ଏକ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ସେହିପରି ଜଣେ ବ୍ୟକ୍ତି ନିଖୋଜ ଅଛନ୍ତି, ଯାହାକୁ ଖୋଜିବା ପାଇଁ ଉଦ୍ଧାରକାରୀ ଦଳ ଉଦ୍ୟମ ଜାରି ରଖିଛନ୍ତି। ଦୁର୍ଘଟଣାରେ ପ୍ରାଣ ହରାଇଥିବା ସମସ୍ତ ଯାତ୍ରୀ ମହାରାଷ୍ଟ୍ରର ବୋଲି କୁହାଯାଉଛି। ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଦୁର୍ଘଟଣାକୁ ଦୃଷ୍ଟିରେ ରଖି ରିଲିଫ୍ କମିସନରଙ୍କ କାର୍ଯ୍ୟାଳୟକୁ ରିଲିଫ୍ କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଛନ୍ତି।
ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ରିଲିଫ କମିସନର ମହାରାଜଗଞ୍ଜର ଏସଡିଏମ ଓ ସିଓ ନୌତନୱାଙ୍କ ସହ ଏସଏଚଓ ସାନୌଲିଙ୍କୁ ଘଟଣାସ୍ଥଳକୁ ପଠାଇଥିଲେ। ଏଥିସହ ମହାରାଷ୍ଟ୍ର ସରକାରଙ୍କ ସହ ଯୋଗାଯୋଗ କରିଥିଲେ। ମୃତଦେହଗୁଡ଼ିକୁ ସଡ଼କ ପଥରେ ଗୋରଖପୁର ବିମାନବନ୍ଦରକୁ ନିଆଯିବ ଏବଂ ସେଠାରୁ ମହାରାଷ୍ଟ୍ରକୁ ବିମାନ ଯୋଗେ ପଠାଯିବ। ରିଲିଫ କମିସନର ଜିଏସ୍ ନବୀନ କହିଛନ୍ତି ଯେ ଶୁକ୍ରବାର ଅପରାହ୍ନ ପ୍ରାୟ ୧ଟା ବେଳେ ନେପାଳର ତାନାହୁନ ଜିଲ୍ଲାରେ ଭାରତୀୟ ପର୍ଯ୍ୟଟକଙ୍କୁ ନେଇ ଯାଉଥିବା ଏକ ବସ୍ ନଦୀକୁ ଖସିପଡ଼ିଥିବା ଖବର ମିଳିଥିଲା। ସେ ନେପାଳ ସରକାରଙ୍କୁ ତୁରନ୍ତ ସାହାଯ୍ୟ ମାଗିଥିଲେ ଏବଂ ନେପାଳରେ ମୁତୟନ ଥିବା ବରିଷ୍ଠ ଭାରତୀୟ ପୋଲିସ ଅଧିକାରୀଙ୍କ ସହ ଯୋଗାଯୋଗ କରିଥିଲେ।
ଦୁର୍ଘଟଣାକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ଯୋଗୀ ରିଲିଫ୍ କମିସନରଙ୍କ କାର୍ଯ୍ୟାଳୟକୁ ରିଲିଫ୍ କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଛନ୍ତି। ରିଲିଫ କମିସନର କହିଛନ୍ତି ଯେ ମୁଖ୍ୟମନ୍ତ୍ରୀ ଯୋଗୀଙ୍କ ନିର୍ଦ୍ଦେଶ କ୍ରମେ ମହାରାଜଗଞ୍ଜର ନୌତନୱା ତହସିଲର ଏସଡିଏମ ଏନପି ମୌର୍ଯ୍ୟ, ସିଓ ଜୟ ପ୍ରକାଶ ତ୍ରିପାଠୀ ଏବଂ ସାନୌଲି ଏସଏଚଓ ଅଙ୍କିତ ସିଂଙ୍କୁ ଘଟଣାସ୍ଥଳକୁ ପଠାଯାଇଥିଲା । ଏଥିସହିତ ଏଡିଏମ୍ ପଙ୍କଜ ବର୍ମାଙ୍କୁ ଟିମ୍ ସହ ସମନ୍ୱୟ ରକ୍ଷା କରିବାକୁ ନିର୍ଦ୍ଦେଶ ଦିଆଯାଇଥିଲା।
ଏହା ସହ ମହାରାଷ୍ଟ୍ର ସରକାରଙ୍କ ସହ ଯୋଗାଯୋଗ ସ୍ଥାପନ କରାଯାଇ ଦୁର୍ଘଟଣା ସମ୍ପର୍କରେ ସୂଚନା ଦିଆଯାଇଥିଲା। ରିଲିଫ କମିସନର କହିଛନ୍ତି ଯେ ମହାରାଷ୍ଟ୍ର ସରକାରଙ୍କ ବରିଷ୍ଠ ଅଧିକାରୀଙ୍କ ଅନୁରୋଧ କ୍ରମେ ଉତ୍ତରପ୍ରଦେଶ ରିଲିଫ କମିଶନରଙ୍କ କାର୍ଯ୍ୟାଳୟ ନିଜ ସ୍ତରରେ ସମଗ୍ର କାର୍ଯ୍ୟ କରୁଛି। ସେ କହିଛନ୍ତି ଯେ ମହାରାଷ୍ଟ୍ର ସରକାର ଏହି ଅପରେସନ ପାଇଁ ଉତ୍ତର ପ୍ରଦେଶ ରିଲିଫ ଅଫିସକୁ ନୋଡାଲ କରିଛନ୍ତି ।
ରିଲିଫ କମିସନର କହିଛନ୍ତି ଯେ ନେପାଳ ସରକାରଙ୍କ ଠାରୁ ମିଳିଥିବା ସୂଚନା ଅନୁଯାୟୀ ବସ୍ ରେ ୪୪ ଜଣ ଯାତ୍ରୀ ଯାତ୍ରା କରୁଥିଲେ। ଏଥିରେ ୪୨ ଜଣ ଯାତ୍ରୀ, ଜଣେ ଡ୍ରାଇଭର ଓ ଜଣେ କଣ୍ଡକ୍ଟର ଥିଲେ। ସେ କହିଛନ୍ତି ଯେ ତାନହୁନ ଜିଲ୍ଲା ନିକଟରେ ରାଜପଥଠାରୁ ପ୍ରାୟ ୫୦୦ ଫୁଟ ତଳକୁ ବସ୍ଟି ନଦୀକୁ ଖସି ପଡ଼ିଥିଲା। ଦୁର୍ଘଟଣା ଖବର ମିଳିବା ମାତ୍ରେ ନେପାଳ ପ୍ରଶାସନ ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ଏହାପରେ ଉତ୍ତରପ୍ରଦେଶ ରିଲିଫ୍ କମିଶନରଙ୍କ କାର୍ଯ୍ୟାଳୟକୁ ଏହି ସୂଚନା ଦିଆଯାଇଥିଲା।
