ନୂଆଦିଲ୍ଲୀ: ଶେଖ ହସିନା ସରକାରଙ୍କ ପତନ ପରେ ବାଂଲାଦେଶରେ ହିନ୍ଦୁଙ୍କ ବିରୋଧରେ ଅତ୍ୟାଚାର ମାମଲା କ୍ରମାଗତ ବଢିବାରେ ଲାଗିଛି । ସଦ୍ୟତମ ଘଟଣାକ୍ରମେ ସେଠାରେ ପିଲାଙ୍କୁ ପାଠ ପଢାଉଥିବା ହିନ୍ଦୁ ଶିକ୍ଷକଙ୍କୁ ଚାକିରିରୁ ଇସ୍ତଫା ଦେବାକୁ ବାଧ୍ୟ କରାଯାଉଛି । ସେମାନଙ୍କଠୁ ବଳପୂର୍ବକ ଇସ୍ତଫା ନିଆଯାଉଛି । ଇଣ୍ଡିଆ ଟୁଡେର ରିପୋର୍ଟ ଅନୁଯାୟୀ, ପଡୋଶୀ ଦେଶରେ ଏ ପର୍ଯ୍ୟନ୍ତ ଅତି କମରେ ୫୦ ହିନ୍ଦୁ ଶିକ୍ଷକଙ୍କୁ ଚାକିରିରୁ ଇସ୍ତଫା ଦେବାକୁ ବାଧ୍ୟ କରାଯାଇଛି ।
ବାଂଲାଦେଶର ବରିଶପାଲର ବେକରଗଞ୍ଜ ସରକାରୀ କଜ୍ରେ ପ୍ରିନ୍ସିପାଲ ଶୁକ୍ଳା ରାଣୀ ହଲଦରଙ୍କୁ ମଧ୍ୟ ନିଜର ଇସ୍ତଫା ଦେବାକୁ ପଡିଛି । ଅଗଷ୍ଟ ୨୯ ତାରିଖରେ ଅନ୍ୟ ସଂପ୍ରଦାୟର ଛାତ୍ର-ଛାତ୍ରୀ ଏବଂ ବାହାର ଲୋକ ତାଙ୍କ କାର୍ଯ୍ୟାଳୟ ଭିତରେ ବଳପୂର୍ବକ ପଶିତ୍ତଉତ୍ପାତ ମଚାଇଥିଲେ । ତାଙ୍କୁ ଇସ୍ତଫା ଦେବାକୁ ବାଧ୍ୟ କରାଯାଇଥିଲା । ଧମକ ଚମକ ଦିଆଯାଇଥିଲା । ଶେଷରେ ପ୍ରିନ୍ସିପାଲ ଶୁକ୍ଳା ରାଣୀଙ୍କୁ ଏକ ସାଧା କାଗଜରେ ମୁଁ ଇସ୍ତଫା ଦେଉଛି ଲେଖି ସରକାରୀ ଚାକିରି ଛାଡିବାକୁ ପଡିଛି ।
ଏହିପରି ବାଂଲାଦେଶରେ ଅନେକ ସ୍କୁଲରେ ହିନ୍ଦୁ ଶିକ୍ଷକ ଏବଂ ଶିକ୍ଷୟତ୍ରୀଙ୍କୁ ଚାକିରି ଛାଡିବାକୁ ବାଧ୍ୟ କରାଯାଉଛି । ନୋବେଲ ପୁରସ୍କାର ପ୍ରାପ୍ତ ବିଜେତା ମହମ୍ମଦ ୟୁନୁସଙ୍କ ପ୍ରତିଶ୍ରୁତି ପରେ ମଧ୍ୟ ବାଂଲାଦେଶରେ ହିନ୍ଦୁ ବିରୋଧୀ ଘଟଣା ଥମିବାର ନାଁ ଧରୁନି । ଏହି କାରଣରୁ ବାଂଲାଦେଶରେ ହିନ୍ଦୁ ଶିକ୍ଷକଙ୍କ ମଧ୍ୟରେ ଭୟର ମାହୋଲ ଦେଖିବାକୁ ମିଳୁଛି । ସେମାନେ ନିଜକୁ ଅସୁରକ୍ଷିତ ମଣୁଛନ୍ତି
