ପେନସିଲ ଚୋରକୁ ଜେଲରେ ଭର୍ତ୍ତି କରିବା ପାଇଁ ଥାନାରେ ଅଭିଯୋଗ କଲେ କୁନି ପୁଅ

ଲାଇଭ ଓଡିଶା ନ୍ୟୁଜ: ମୋ ସାଙ୍ଗ ଜଣେ ଚୋର । ବାରମ୍ବାର ମନା କଲେ ମଧ୍ୟ ସେ ପେନସିଲ ଚୋରୀ କରୁଛି । କିଛି ଭି ଶୁଣୁନି । ଏମିତି ଅଭିଯୋଗ ନେଇ ଥାନାରେ ପଂହଚିଲା ଜଣେ କୁନି ପୁଅ । ଯାହାକୁ ଦେଖି ଥାନାରେ ସମସ୍ତେ ଆଶ୍ଚଯ୍ୟ ହୋଇଯାଇଥିଲେ । ପିଲାଟି ଛୋଟ ହେଲେ ମଧ୍ୟ ତାର ବୁଦ୍ଧିକୁ ମାନିବାକୁ ପଡିବ । ଛୋଟବେଳୁ ସେ ଆଇନର କାର୍ଯ୍ୟ ବୁଝିବାକୁ ସକ୍ଷମ ହୋଇଛି । ଏଭଳି ଘଟଣା ଦେଖିବାକୁ ମିଳିଛି ଆନ୍ଧ୍ରପ୍ରଦେଶର ଏକ ପୋଲିସ ଷ୍ଟେସନରେ । ଘଟଣାଟି ଜାଣବା ପୂର୍ବରୁ ପ୍ରଥମେ ଆପଣ ମାନେ ଏହି ଭିଡିଓଟି ଉପରେ ଟିକେ ନଜର ପକାଇଦିଅନ୍ତୁ । ପେନସିଲ୍ ଚୋର ସାଙ୍ଗକୁ ଧରି ଥାନାରେ ପହଞ୍ଚିଲା କୁନି ପୁଅ । ଏବଂ ତାଙ୍କର ବିରଳ ଅଭିଯୋଗ ଶୁଣି ଥାନାରେ ସମସ୍ତେ ହସୁଛନ୍ତି । ସାଙ୍ଗରେ ବସୁଥିବା ପିଲାଟି ସବୁଦିନ ପେନସିଲ୍ ଚୋରି କରିନେଉଛି କହି ପୋଲିସରେ ଅଭିଯୋଗ କରିବାକୁ ଆସିଥିବା କହିଛନ୍ତି । ଆନ୍ଧ୍ରପ୍ରଦେଶ ପୋଲିସ ନିଜର ଅଫିସିଆର ଟ୍ୱିଟର ହ୍ୟାଣ୍ଡେଲରେ କୋମଳମତି ପିଲାଙ୍କ ଏହି ଅଭିଯୋଗର ଭିଡିଓ ସେୟାର କରିଛି । ଅଳ୍ପ ସମୟ ମଧ୍ୟରେ ଭିଡିଓଟି ଭାଇରାଲ ହୋଇଯାଇଛି । ଭିଡ଼ିଓରେ ଚେକ୍ ସାର୍ଟ ପିନ୍ଧିଥିବା ଜଣେ ପିଲା ସବୁଜ ସାର୍ଟରେ ଥିବା ପିଲା ଆଡ଼କୁ ଅଙ୍ଗୁଳି ଦେଖାଇକି କହୂଛି ଯେ, ଏହି ସାଙ୍ଗ ମୋ ବିନା ଅନୁମତିରେ ପେନସିନ୍ ନେଇଯାଉଛି । ମୋ ପାଖରେ ଏହାର ପ୍ରମାଣ ମଧ୍ୟ ଅଛି । ପ୍ରମାଣ ହାତରେ ଧରି ପୋଲିସ ନିକଟରେ ଅଭିଯୋଗ କରିବାକୁ ଆସିଛି । ଆଉ ପୋଲିସ୍ ବାବୁ ସାଙ୍ଗ ବିରୋଧରେ ମାମଲା ରୁଜୁ କରନ୍ତୁ ବୋଲି କହୁଛି। ସହପାଠୀ ବିରୋଧରେ କେସ୍ କରିବା ପାଇଁ ଜିଦ୍ ଧରିବା ପରେ ଅଭିଯୋଗକୁ ଅତି ଆଗ୍ରହ ସହକାରେ ଶୁଣିଥିଲେ ପୋଲିସ୍ ବାବୁ । ଆଉ ଅଭିଯୋଗ କରିବାକୁ ଆସିଥିବା ପିଲାକୁ ବୁଝାଇଥିଲେ । ସହପାଠୀ ବିରୋଧରେ କେସ୍ ହେଲେ, ତାକୁ ଜେଲ୍ ଯିବାକୁ ପଡ଼ିବ । ସେ ଆଉ ପାଠ ପଢ଼ି ପାରିବନି । ଜେଲରେ ଜୀବନ ବହୁତ କଷ୍ଟସାଧ୍ୟ ବୋଲି ବୁଝାଇଥିଲେ । ଏହାପରେ ଉଭୟଙ୍କ ମଧ୍ୟରେ ଆପୋଷ ବୁଝାମଣା କରାଇବା ସହ ହାତ ମିଳାଇବାକୁ କୁହା ଯାଇଥିଲା ହେଲେ ସମସ୍ୟାର ସମାଧାନ ପରେ ମଧ୍ୟ ଅଭିଯୋଗ କରିଥିବା ଛାତ୍ର ମାମଲା ଦାୟର କରିବାକୁ ଜିଦ୍ ଧରିଥିଲା । ଭବିଷ୍ୟତରେ ଏପରି ହେବନି ବୋଲି ପ୍ରତିଶ୍ରୁତି ଦେଇଥିଲେ ପୋଲିସ୍ ବାବୁ । ଉଭୟେ ଏବେ ପାଠ ପଢ଼ା ଉପରେ ଧ୍ୟାନ ଦିଅ ତଥା ଉଭୟଙ୍କ ମଧ୍ୟରେ ବନ୍ଧୁତ୍ୱପୂର୍ଣ୍ଣ ସମ୍ପର୍କ ରଖିବାକୁ କହିଥିଲେ ।